Judo — Nyu-Yorkning shovqinli hayotidan va darz ketgan turmushidan qochib, bobokalonlarining yurti Sarayevoga yo‘l olgan rassom ayol.

U bu qadim shahar ko‘chalarida nafaqat ajdodi Jalol Hurmatning o‘chib ketgan izlarini, balki o‘zining yo‘qolgan “men”ini ham qidiradi.

Bu kitob 1860-yillardan boshlanib, Bosniyadan Hayfaga, undan Ommonga va nihoyat Amerikagacha cho‘zilgan ulkan bir sulolaning muhojirlik qissasidir.

Asarni o‘qiyotib, Sarayevoning tor ko‘chalarida yangragan mahzun sevdalinkalar, Mostar ko‘prigi ostidan oqib o‘tayotgan daryoning shovqinini eshitasiz. Bir asrlik judolikdan keyin yana tutashgan taqdirlarga guvoh bo‘lasiz.

Judo singan ko‘zani butlay oladimi? Uzoq yillar avval aytilgan “Men hech shunday bo‘larmidim, sen hech bunday bo‘lmasang...” qo‘shig‘i uning hayotini butunlay o‘zgartiradimi?