O‘ZBEK XALQ OG‘ZAKI IJODI: KUNTUG‘MISH (DOSTON)

  Qo‘lingizdagi ushbu kitob, ya’ni "Kuntug‘mish" dostoni o‘zbek xalq og‘zaki ijodiga mansub bo‘lib ming yillar davomida xalqimiz baxshilari tomonidan kuylanib, xalqimiz tomonidan sevib tinglangan.

 "Kuntug‘mish" dostonining ushbu nusxasi xalqimizning mashhur baxshisi Ergash Jumanbulbul o‘g‘li (1868-1937) tomonidan kuylangan va Muhammad Isa Ernazar o‘g‘li tomonidan yozib olingan. To‘liq holatda yozma holatga keltirilishi esa Hodi Zarif (1905-1972) tomonidan amalga oshirilgan.

 "Kuntug‘mish" dostonida o‘zbek xalqining azal-azaldan imon-e’tiqod, or-nomus, do‘stga sadoqatning va sof muhabbatning ulug‘lanishi yorqin ranglarda aks ettirilgan. Siz dostonni o‘qish davomida Xolbeka va Kuntug‘mishning g‘oyibona bir-birga oshiq bo‘lishi, ularning zolimlardan qochib ko‘rgan qiyinchiliklari, egizak farzand ko‘rishlari, bir-birlaridan vaqtincha judo bo‘lishlari, farzandlari – Gurkiboy va Mohiboyning sarguzashtlari, Azbarxo‘ja ismli karvonboshining razilligi, Kuntug‘mishning shoh bo‘lishi va qaytadan Xolbeka hamda farzandlari bilan topishishga guvoh bo‘lasiz.