O‘zbekiston Respublikasi Oliy ta’lim, fan va innovatsiyalar vazirligi huzuridagi Bilim va malakalarni baholash agentligi tomonidan ingliz tili bo‘yicha ko‘p darajali test sinovi Multilevel imtihonini topshirish va tegishli daraja milliy sertifikatini egallash amaliyoti joriy etilgan. Mazkur test topshiriqlari formatining maqsadi ingliz tilini bilishning B1, B2 va C1 darajalarini aniqlash uchun qo‘llaniladigan test variantlari tarkibi va unga qo‘yiladigan talablarni belgilashdan iborat, ya’ni talabgor B1, B2, C1 darajalaridan birida baholanadi.

Talabgor multilevel imtihonidan B2 darajani egallasa, Oliy ta’lim muassasalariga imtihon topshirish jarayonida ingliz tili bo‘limidan imtihon topshirmasdan turib maksimal ball olish imkoniyatiga ega bo‘ladi. Shuningdek, B2 va C1 darajasi mavjud bo‘lgan xodimlarining oylik maoshiga 50 foizgacha bo‘lgan qo‘shimcha ustama haqi qo‘shilishi belgilangan.

Ijtimoiy va moddiy taraflama qo‘llab-quvvatlash Multilevel testini topshirishga qiziqish bildirayotgan talabgorlar soni kundan-kun ortishiga sabab bo‘lmoqda. Nisbatan yangi imtihon turi ekanligi sababli imtihonga tayyorlanish jarayonlarida o‘quv qo‘llanma va namunaviy test topshiriqlarini topishda qiyinchilikka duch kelish holatlari ko‘p kuzatilayotganligi sababli Multilevel imtihoniga tayyorgarlik ko‘rish bo‘yicha bilimni oshirish va mashq qilish uchun mazkur qo‘llanmani e’tiboringizga havola qildik.

Marhamat, mazkur kitob orqali B1 darajasidan C1 darajasiga qadar bilimingizni oshiring, omad yor bo‘lsin!