Men suyukli Payg‘ambarimiz sollallohu alayhi vasallamning hayot yo‘llarini, siyratlarini o‘rganar ekanman, bugungi kunimizdagiga o‘xshash juda ko‘p holatlarni uchratdim. Lekin ko‘pchilik insonlar ularni bilmaydilar. 

Men Rasuli akram alayhissalomga tom ma’noda ergashishni odat tarzimizga aylantirishni istadim. Nabiy sollallohu alayhi vasallamdan bugungi kunda qanday hayot kechirishimiz zarurligini o‘rganishimiz kerakligini bayon qilishni xohladim. Jamiyatimizdagi ildiz otgan muammolarga, g‘am-g‘ussalarga qay tarzda butunlay barham berish kerakligini bilish uchun Habibimizdan ta’lim olish lozimligini ochiqlashga harakat qildim. 

Olamlar Sarvari sollallohu alayhi vasallamning tengi yo‘q hayot yo‘llarini o‘qib-o‘rganib, shunday ulug‘ Payg‘ambarning ummati ekanimdan, shunday go‘zal Islom bilan aziz bo‘lganimdan faxrlanib ketdim. Zero, u zot biz uchun mukammal dastur shariatni o‘rnatib ketdilar.